Holi Hai

Recap 2011

Rajneeti me Naya Daur

Do take ki naukari ko, maange humse degree ka hisaab,
Aur desh chalane walo ne, chahe kabhi na dekhi ho kitaab.

Ek sadharan naukari ko aptiude, attitude, GD, PI ki guhaar,
Aur Relevant Work-Experience ki koi jarurat nahi, banaate huye sarkar.

Khel Mantri ne na khela hoga kabhi gilli-dande ka bhi khel,
Aur B.A.L.L.B chala rahe honge hamare desh ki rail.

IT minister ne na kiye ho kabhi computer ke darshan,
Aur Arts graduate kar rahe honge desh ka krishi-marg darshan.

Petroleum Minister ka Petroleum se na hoga door-door ka naata,
Aur na jaane kaun hi bhaisaab sambhal rahe honge desh ka bahi-khaata.

Waqt hai ab rajneeti me naye daur ka, election nahi selection ka,
Rajneeti me bhi ho ab bolbala Hiring aur Firing ka.

Padhe likho ko ab satta me laao, targets deke kaam karvao,
Jo na kare kaam, usko de laat bhagao.

Ab Samay hai desh me kranti ka, todne loktrant ki bhranti ka,
Aur jarurat nahi hai ab rajneeti ki, samay hai karmaneeti ka.

Hum bhi kam nahi!!!

Har haste mushkurate chehre ke peeche,

Utni hi khushi chuppi ho,

Yeh jaruri to nahi,

Shayad Mushkurana uski majboori hi sahi

Logo se has kar milna,

Yaaro me hasna aur hasana,

Aur fir akele me,

Apne aanshuyo ko chupana

Duniya ke liye ek khushnuma chehra,

Jiske peeche shayad koi raaz gehra,

Dil ke dard par,

Laga ho koi kada pehra

Logo ko kahna- tum to sada hasate ho,

Doosre ke gum bhulate ho,

Kaise hamesha mushkurate ho,

Kaise hamesha khush nazar aate ho

Hai hamara jawab- Jinki aankhein aanshuyo se nam nahi,

Kya samjhate ho, unhe koi gum nahi,

Tum tadapkar ro diye, to kya,

Gum chupakar hasne wale hum bhi kam nahi!!!

Aanshuyo ko panah nahi milti!!

Yeh Ishq ki duniya bhi gajab hai,

Pyar karne walo ki baat bhi ajab hai,

Jeete hai yeh, mar jane ko,

Aur mar bhi jaate hai, yeh jeene ko

Kuch Ishq yuh ki unko alfaazo ki jarurat nahi padti,

Kuch ishq yuh ki unko bayaan karne ki ghadi nahi milti,

Kuch ishq yuh ki unko dilruba ki raza nahi milti,

Aur Kuch ishq yuh ki unko is duniya ki rehmat nahi milti

Hamare Ishq ko unki raza nahi milti,

Kah bhi de fir bhi, dard-e-dil ki dawa nahi milti,

Is bewafai bhari duniya me, wafa bhi nahi milti,

Woh dil tod kar haste hai, fir bhi unko saza nahi milti

Lakh koshish kar ke bhi hamari unse nazare nahi milti,

Har ishq ko yahan apni manjil nahi milti,

Kabhi Majnoo ko Laila, to kabhi Farhad ko Sheeri nahi milti,

Yahan to apni hi aankho me, aanshuyo ko panah nahi milti!!

Nasha

Nasha nashe me hai,

Aur nashe me hai hum,

Isi nashe ki khatir,

Yeh nasha na ho kabhi kam

Kisi ko daulat ka nasha,

Kisi ko mohabbat ka nasha,

Kisi ko unke deedar ja nasha,

Aur kisi ko hai unki aankho ka nasha

Koi nashe me doob jata hai,

To kisi ko doobne ka nasha chaa jata hai,

Kabhi sharab me, kabhi shabab me,

Kabhi ikraar me, kabhi intezaar me,

Kabhi kisi ke pyaar me

Is nashe ka jo nasha hai,

Humne jisko chakha hai,

Yaaro, baat meri maano,

Isi me jeevan ka maja hai!!

Gazal

Shayar ke dabe jazbaat khud me ek Gazal hai,
Kisi ki chah me ek aah bhi Gazal hai,
Kisi ke intezaar me har ek nigaah bhi Gazal hai,
Teri aur Meri to pyaas bhi ek Gazal hai

Aashiq ki tadap khud me ek Gazal hai,
Premi ki virah-vedna bhi Gazal hai,
Mohabbat me toota dil bhi Gazal hai,
Teri aur Meri to dastaan bhi ek Gazal hai

Chaand ki sheetal chandni khud me ek Gazal hai,
Savaan ki pahli barsaat bhi Gazal hai,
Sardi ki bheegi-bheegi raat bhi Gazal hai,
Teri aur Meri to har tanha raat bhi ek Gazal hai

Jaane-Jigar ki muskurahat khud me ek Gazal hai,
Uski to ikraar ki aada bhi Gazal hai,
Uski to inkaar ki aada bhi Gazal hai,
Teri aur Meri to har pukaar bhi ek Gazal hai

Aalfaazo me chupa dard khud me ek Gazal hai,
Sher ki har siski bhi Gazal hai,
Nazm ka har ask (aanshu) bhi Gazal hai,
Aur teri meri to maut bhi ek Gazal hai!!
-rusty